# انتقام لزفاف زوجي
**الحلقة الأولى**
«أنا قررت إني هتجوز تاني يا مريم».
بصيتله بهدوء، ورغم الصدمة رديت بنفس الهدوء وقلت:
«بجد؟ ليه يا ترى يا أستاذ عمر؟»
رد عليا بانفعال طفيف وقال:
«إنتِ باردة كده ليه؟ على فكرة أنا مش بهددك يا مريم، أنا بتكلم بجد. أنا هتجوز تاني».
قومت وقفت وقلت بكل هدوء، رغم الوجع اللي كنت حاسة بيه جوايا:
«تمام، وأنا بسألك عن السبب. عايزني أعمل إيه يعني؟ أقعد أعيط؟ ما إنت لو عايز تبدأ حياة جديدة يا عمر، أنا هزعل عليك».
اتكلم من تاني باستفزاز ونبرة خالية من المشاعر:
«بعيد عن كلامك، أنا زهقت من طلباتك ومن إنك مش فاضية لي طول اليوم ومش مهتمة بيا. خلاص، أنا هجيب اللي تهتم بيا، وخليكي إنتِ في شغل البيت والولاد وباقي المسؤوليات».
اتنهدت، وبدأت أترعش من الانفعال اللي كنت كاتماه، وقلت:
«وهو ده مش بيتك وولادك اللي أنا بهتم بيهم؟ ولا حضرتك عايز إيه بالظبط؟ ولو اهتميت بنفسي شوية هتقول إني مهملة، صح؟»
رد عليا بعدم اهتمام وقال:
«والله بقى، مهملة ولا مهتمة، عيالي وبيتي أديني عرفتك عشان متتفاجئيش».
اتكلمت وأنا بحاول أهدي نفسي، وقلت بتساؤل وابتسامة مصطنعة على وشي:
«ويا ترى بقى حضرتك اخترت العروسة الجديدة ولا لسه؟»
اتكلم وهو داخل الحمام بلا مبالاة:
«قريب، متقلقيش عليا».
قعدت مكاني، وأنا متضايقة من كلامه وباكل في نفسي من كتر الزعل. عارفة إن عمر كل مرة بيهددني بالطريقة دي، لكن حتى كلامه كان بيضايقني، لأني بحبه. عمر حب عمري قبل الجواز، مش بس جوزي وأبو عيالي.
خرج من الحمام، وكنت جهزتله الأكل وحطيته على السفرة. بص للأكل وبصلي، وقال وهو ماشي:
«مش جعان دلوقتي، شيلي الأكل».
شيلت الأكل وأنا زعلانة، وقلبي اتكسر بجد. الحركة دي من أكتر الحاجات اللي ممكن تحسس أي ست إن تعبها طول اليوم مش متقدر.
دخل ينام، وأنا فضلت سهرانة بعيط وزعلانة من كل اللي بيحصل معايا. ضغط البيت والولاد، وأنا نفسي مش لاقية وقت أعيش فيه ولا حتى آخد نفسي، وهو سايب عليا كل مسؤولية الأولاد.
وبرغم كل ده، هو كمان مش عاجبه الوضع. أيوه، أنا مقصرة معاه، بس غصب عني. أنا كمان محتاجة أرتاح وأعيش حياتي شوية، وواحشاني أيامي مع عمر قبل الخلفة. لكن الوضع اتغير عليا وعليه، مش عليا أنا بس، وهو المفروض يفهم ده.
دخلت نمت، وأنا حقيقي تعبانة جدًا من كتر الزعل والتفكير.
تاني يوم قررت إني أروح للكوافير وأغير لون شعري، وأحاول على قد ما أقدر أوفر وقت لنفسي ولعمر.
رجعت البيت بعد ما خلصت شعري، وجهزت العشا اللي عمر بيحبه. كمان وديت الولاد عند ماما عشان نقعد أنا وهو لوحدنا وقت أطول، ونتكلم ونتصافى ونقفل اللي فات.
خلصت الأكل وكل حاجة، وقعدت أستناه. لكن عدى ساعة واتنين وتلاتة، لحد ما الساعة جت اتنين بالليل. وقتها قلقت عليه وفضلت أتصل بيه، لحد ما في الآخر المكالمة اترد عليها بعد المرة السادسة، وكانت حماتي اللي قالت بنبرة ملل:
«إيه في إيه؟ نازلة زن زن ليه؟ خير؟»
اتصدمت إنها هي اللي ردت عليا، وقلت بنبرة متقطعة:
«حماتي؟ هو عمر عندك؟»
نفخت وقالت بضيق:
«أيوه يا حبيبتي، عندي. هو مش مبلغك إنه هيتجوز تاني؟ أصل بكرة فرحه يا حبيبتي».
اتصدمت وحسيت إن الدنيا كلها بتلف بيا، ومش قادرة أسند طولي، لحد ما قدرت أتكلم وقلت:
«إيه اللي إنتِ بتقوليه ده يا حماتي؟ فرح مين اللي بكرة؟»
ضحكت ضحكة واضحة وقالت بنبرة مستفزة:
«إيه الصدمة دي؟ فرح ابني عمر يا حبيبتي».
غمضت عيني وأنا باخد نفسي، وحاولت أبقى هادية وماحسسهاش بمدى تأثري، وقلت باستهزاء مصطنع رغم تعبي:
«هه، ولقيتوا حد يرضى بيه يا حماتي؟ يلا، بركة، خليني أرتاح من المشاكل دي».
ردت عليا بعصبية وقالت:
«إيه اللي إنتِ بتقوليه ده؟!»
مستنتش تاني وقفلت المكالمة. ممكن تشوفوا ده تصرف مش مناسب، لكن الحقيقة إن حماتي مش بتحبني في الأساس. مكانتش عايزة واحدة من مستوايا المادي العادي لابنها، كانت عايزاله بنت حياتها كلها مريحة ومتوفر لها كل حاجة.
تجاهلت تمامًا ظروف ابنها المادية، ويمكن كانت متوقعة إن العروسة الجديدة هتساعده وتصرف عليه وعليها.
قعدت على أقرب كرسي، وأنا حاطة راسي بين إيديا وبعيط. لو الموضوع ده حقيقي، يبقى حياتي الزوجية انتهت فعلًا من كل الجهات، ومش هعيش مع عمر تاني. يبقى فعلًا خسرني للأبد.
فضلت مكاني بعيط لحد ما نمت من التعب.
تاني يوم صحيت ومسكت موبايلي، واتصلت بعمر وأنا بتمنى من جوايا يكون كل اللي حصل ده مجرد كابوس وخلص. كنت بهز رجلي من كتر التوتر، لحد ما رد.
اتكلمت بسرعة وقلت:
«إيه يا عمر؟»
لكن للمرة التانية حماتي هي اللي ردت عليا، وقالت بنبرة واضحة:
«هو أنا مش قلتلك إن عمر فرحه النهارده يا حبيبتي؟ تليفونه معايا، هو مش فاضي يرد على حد. ابني حبيبي في جلسة التصوير بتاعة الفرح دلوقتي، وبعدها هيروح القاعة».
دموعي نزلت من تاني، لكن ماحسستهاش بحاجة، وقلت بهدوء وأمل ضعيف:
«إنتِ بتكدبي عليا يا حماتي، صح؟ طب لو مش بتكدبي، ليه هو مايردش عليا ويقولي ده بنفسه؟ إنتِ عايزة تكسري قلبي، صح؟»
ضحكت ضحكة خلتني أحس إني قليلة أوي، وقالت باستهزاء:
«هضحك عليكي ليه؟ حالًا هبعتلك صورهم، وأبعتلك مكان القاعة كمان، عشان لو حبيتي تيجي يا حبيبة قلبي».
قفلت معايا المكالمة، وفضلت قاعدة على أعصابي لحد ما سمعت صوت الرسالة. فتحتها، وكانت فعلًا صور لعمر وهو واقف جنب واحدة لابسة فستان، وقدامهم مصور في مكان شبه أماكن جلسات التصوير بتاعة الأفراح.
فتحت الموقع اللي بعتتهولي، وعيوني مليانة دموع، وبحاول أركز عشان أشوف كويس، وفعلاً عرفت مكان القاعة.
قومت وقفت، وأول حاجة عملتها إني كلمت ماما. أول ما ردت، قلت بسرعة ومن غير تفسير:
«ماما، معلش يا حبيبتي، خلي الأولاد عندك النهارده كمان. وأنا هجيلك بالليل، بس قبل ما ده يحصل هتلاقي عربيات نقل جاية تنقل عفشي القديم. استقبليهم عادي لحد ما أجيلك وأفهمك».
ردت ماما باستغراب وقالت بقلق:
«ليه يا بنتي؟ فهميني الأول».
جاوبتها بسرعة، وأنا مش قادرة آخد نفسي بشكل طبيعي من التوتر ونبضات قلبي العالية:
«معلش يا ماما، لما أجيلك هفهمك. المهم تخليهم ينقلوا العفش في الأوضة اللي تحت، وتقفلي عليه كويس يا ماما، لحد ما أجيلك. حاضر يا حبيبتي؟»
قفلت المكالمة معاها، وقعدت من تاني وأنا بعمل مكالمة تانية، ومش مبطلة هز رجلي من التوتر.
لحد ما الطرف التاني رد، وقلت:
«إيه يا ريهام يا حبيبتي؟ بصي، عايزاكي دلوقتي تبعتيلي عربيات النقل اللي نقلتوا عليها عفشك لبيتي. ضروري، عشان عايزة أنقل عفشي القديم عند ماما، عامللي زحمة».
ردت ريهام صاحبتي بهدوء:
«خلاص ماشي يا حبيبتي، هخلي حسين جوزي يكلمهم وييجوا على عنوانك دلوقتي».
اتنهدت وقلت بنبرة شكر وارتياح شوية:
«تسلميلي بجد يا ريهام».
خلصت معاها، لكن المكالمات ماوقفتش عند كده.
كلمت عم بدوي، بتاع الأقفال اللي في شارع ماما، وطلبت منه يجيلي بقفل جديد. مرضيتش أجيب الشخص اللي تحتنا عشان عمر مايعرفوش.
وأول ما جه، خليته يغير قفل شقتي، وعمل نسخة واحدة بس كانت معايا.
ماعداش بعدها تلت ساعة، وكانت عربيات النقل وصلت. طلعوا نقلوا كل عفشي القديم من الشقة التانية بتاعة عمر اللي قدامنا، اللي كان واخدها احتياطي لعيالنا أو للمستقبل.
الرجالة خلصوا نقل، واديتهم عنوان ماما عشان ينقلوا العفش هناك، وحاسبتهم.
دخلت بعدها أوضتي، وطلعت فستان سهرة كنت جايباه لفرح صاحبتي آخر الشهر، لكن طلعته وقلت لنفسي:
«مايضرش ألبسه في فرح جوزي وحبيبي برضه».
لبست الفستان، ولفيت تربون على شعري من غير ما أغطيه بالكامل، وحطيت مكياج. شعري كان أكتر حاجة عمر بيحبها، لكن دلوقتي ماكانش فارق معايا رأيه.
نزلت وروحت القاعة.
كان قاعد هو والعروسة على الكوشة، وحماتي قاعدة جنبهم. أول ما دخلت القاعة، لفتت أنظار ناس كتير، سواء اللي عارفينني وعارفين أنا مين، أو اللي بصوا لي بإعجاب.
وصلت قدام عمر، واللي أول ما شافني بصلي بصدمة، ووقف وهو بيقول بعدم تصديق وتوتر:
«إنتِ إيه اللي جابك هنا يا مريم؟ وعرفتي منين؟ وإيه اللي إنتِ عاملاه في نفسك ده؟»
بصيتله بابتسامة ثقة، وبعدها بصيت لحماتي وقلت:
«جاية أباركلك يا جوزي على جوازتك التانية. وبالنسبة لعرفت منين، فده من والدة حضرتك اللي بتحبني أوي. وبالنسبة للسؤال الأخير، فأنت من دلوقتي مالكش دعوة أنا بعمل إيه في نفسي».
بصيت للعروسة من فوق لتحت وقلت باستهزاء:
«بس أنا كنت فكراك هتجيب واحدة أحلى مني. خيبت ظني يا عمر! ويا ترى عرفتها فين عشان توافق تتجوزك في يوم وليلة كده؟»
ردت هي عليا بعصبية، وقالت بابتسامة واثقة:
«بس عمر ماعرفنيش في يوم وليلة يا حبيبتي. اللي مش عاجباكي دي هو اختارها وحبها من سنين، وإنتِ كنتِ بالنسباله مسؤولة عن الأولاد مش أكتر».
حسيت كأن جردل ميه ساقعة نزل عليا. أنا فعلًا أخدت صدمة عمري، أكبر حتى من صدمة فرحه.
بصيت لعمر، اللي كان واقف متوتر، لكنه بيحاول على قد ما يقدر يخفي توتره، وفشل في ده.
قلت بصدمة والكلام تقيل على لساني:
«الكلام اللي هي بتقوله ده صح يا عمر؟ بقالك سنين عايش معايا، وبناكل من نفس الطبق، وبنعيش تحت سقف واحد، وإنت كنت بتخبي عني الحقيقة؟»
حمحم وقال بصوت بيحاول يخليه حاد:
«أيوه يا مريم، زي ما سمعتي. بس أنا من وجهة نظري إن علاقتنا ماكنتش مستقرة، وبعدين أنا كل فترة كنت بأكد عليكي موضوع إني هتجوز تاني، يعني ماخبيتش إن ده احتمال وارد».
بصيت في الأرض، وأنا بحاول أثبت نفسي وماخليش حد يحس بضعفي، وبعدها رجعت بصيتله وابتسمت رغم وجع قلبي وقلت:
«مفيش مشكلة. أهو تصرفك ده هو اللي بيخليني أراجع نفسي وأتأكد إنك تستحق تتحمل نتيجة اختياراتك، وإنك هتعرف قيمة اللي خسرته لما تلاقي حياتك اتغيرت من غيري».
مشيت من الفرح وراسي مرفوعة والابتسامة لسه على وشي. لكن بمجرد ما خرجت برا القاعة، وقفت وأنا باخد نفسي بصعوبة، ومش قادرة أتحمل الزعل.
عيوني بدأت تنزل دموع، كأن كل الدموع اللي كنت حابساها قررت تنزل مرة واحدة.
