في بيت عم رحيم أبو وُرد؛ كان سليمان قاعد والسعادة على وشه، مش مصدق أن أخيراً قعدوا سوا لوحدهم. كانت وُرد قاعدة على الأنتريه وهي بتفرك إيديها بتوتر، شعرها نازل على وشها.
بدأ سليمان يتكلم وقال:
ـ مش ناوي تسأليني عن حاجة؟
هزت وُرد راسها بتوتر، فقال سليمان وهو بيضحك بسعادة وتوتر:
ـ مكنتش متخيل في يوم أنك تكوني ملكي، حاسس إني بحلم! تعرفي أنا بحلم باليوم ده بقالي قد ايه؟ تعرفي إني رُغم جوزي بس محدش قدر يحتل قلبي زيك، وُرد أنا بحب…
قاطعتْه بعيون مدمعة وقالت:
ـ سليمان، أنا مش بحبك!
بتقولي إيه؟!
قالها سليمان وهو بيرمش، حس وكأنها جابت خنجر وضربته في قلبه. مكانش مصدق أن أحلامه بتتسرب من إيديه، هو بيحبها ومش هيقدر يخسرها، بلع ريقه وقال:
ـ هتحبيني.
دموعها نزلت أكتر وقالت:
ـ مقدرش أضمنلك ده.
ابتسم وقال:
ـ بس أنا أقدر أضمنلك إني هحبك أكتر من أي حاجة، هحبك بطريقة تخليكي غصب عنك تحبيني، بس أديني فرصة.
مسحت وُرد دموعها وقالت:
ـ ماشي، موافقة بس نعمل خطوبة الأول.
ابتسم هو وقال:
ـ وأنا تحت أمرك.
في البيت؛ كنت قاعد على الأنتريه ضامة رجلي بإيدي لجسمي وأنا بعيط جامد، قلبي كان واجعني قوي. متخيلة بعد ما يتجوزها إيه اللي هيحصل؟ حبه كله هيكون ليها وأنا هتركن على الرف. كان جزء مني نندمان إني وافقت إنه يتجوز، بس جزء تاني شايف أن سليمان يستحق السعادة، سليمان هو كل حياتي، مكنتش أقدر أشوفه تعيس حتى لو هحرق قلبي بإيدي!
في بيت أحمد؛ كان قاعد سليمان وكان قالع الجاكيت بتاع البدلة مشمر القميص الأبيض بتاعه، كان مريح على الأنتريه وهو بيشرب النيسكافيه بتاعه. كان أحمد بيبصله، كان باين على سليمان الراحة.
ـ مش مصدق إني بحقق حلمي بجد، مش مصدق، حاسس إني في حلم حلو، حلم جميل، أنا حاسس كأني طاير يا أحمد.
كان أحمد بيبصله بغيظ وقال فجأة بانفعال:
ـ أنت أناني يا سليمان!
بص له سليمان بصدمة عشان يكمل هو:
ـ أيوه أناني! رقية بتحبك، متستاهلش كده منك، هي اللي وقفت جنبك في حزنك، هي أكتر واحدة أدت لك حب، اتجوزتك وهي عارفة أنك مش بتحبها بس افتكرت أن حبك ليها كفاية، دعمتك في شغلك، اتحملت كتير، إزay يجيلك قلب تحرق قلبها بالشكل ده؟! أيوه عارف أن حقك شرعاً، محدش يقدر ينكر حقك ده، بس أنت شايف أنك لو عملت كده مش هتقهرها؟ فاكر أن عشان وافقت أنك تتجوز معناها أنها راضية؟ هي بتموت من جوة أنا عارف، أنا فاهم، أنا عارف!
عيون سليمان بقت حمرا من الغضب، وكان هادي الهدوء قبل العاصفة وهو بيسمع كلام أحمد، بعدين قال بهدوء:
ـ عارف إيه؟!
ـ عارف يعني إيه الإنسان اللي بتحبه يبقى مع حد تاني غيرك؟ عارف يعني إيه مرارة الغيرة؟ عارف يعني إيه تبدي سعادة اللي بتحبه على سعادتك؟
قام سليمان فجأة وقرب من أحمد، وبعدين مسكه من قميصه وقربه منه عينيه بتلمع بغضب:
ـ أنت بتحبها! بتحب مراتي يا أحمد؟ كدبت عليا وقُلت لي إنك لما أتقدمتلها بس عشان شوفتها مناسبة، لكن أنت حبيتها، صح؟!
ـ أيوه أنا…
وقبل ما يكمل كلامه كان سليمان بيضربه بعنف!
أطلع من حياتنا أنا ومراتي يا أحمد سامع؟ صداقتنا انتهت!
قالها سليمان وعينيه بتبرق بغضب، وأحمد كان واقع على الأرض، سليمان فعلاً كان زي الوحش. بص أحمد بتعب ليه وقال:
ـ أنا مش باحاول أخد منك مراتك يا سليمان، أنا بنصحك، لو خسرت رقية هتندم قوي، أنت بتحبها، مشاعرك ناحية وُرد انجذاب لحاجة أنت مقدرتش تمتلكها، بس لما تمتلكها شغفك كله بيها هيختفي، متعملش كده، متكسرش قلب رقية عشان هتبقَى كده بتكسر قلبك أنت، هتكستر قلبك لأنها هتيجي في يوم وتمشي.
ـ اخرس! قولتلك اخرس!
صرخ في وشه وهو بيقرب منه عشان يضربه مرة تانية، بس وقف وهو بيتنفس بتعب وبيقول:
ـ أنت.. أنت حقير ومش هتنول اللي أنت عايزه، رقية مش هتسيبني لأني أنا بحبها وهي بتحبني، أنا مش هسمح لرقية أنها تضيع من بين إيديا.
وبعدين سابه ومشي.
قام أحمد بتعب وهو بيمسح مناخيره بالمنديل، كان حاسس أن جسمه كله وجعه، سليمان فضى غلبه كله فيه. قعد على الأنتريه بتعب، مكانش حاسس بالغضب من سليمان بالعكس، كان شفقان عليه لأن سليمان لو خسر رقية هعاني في حياته.
طلع موبايله وهو بيخون وعده بنفسه، طلع صورتها؛ صورة رقية، صورتها وهي عندها 16 سنة، كانت صورة ليها هي وسليمان وأحمد وياسمين. ابتسم وهو بيبص لرقية، رقية كانت حلمه هو، حبها قبل ما يعرف معنى الحب، بس عيون رقية كانت على سليمان، ولما سليمان حب وُرد افتكر أن دي فرصته عشان يتقدملها بس اترفض، وهو مقالش إنه بيحبها لما سأله سليمان بغيرة عن السبب اللي خلاه يتقدم لرقية بعد ما اتجوزها كدب عليه وقاله إنه شافها مناسبة ليه.
غمض أحمد عينيه وهو ببتمنى إن سليمان ميخسرش رقية، بيتمنى فعلاً كده.
كنت نايمة على سريري، كنت بين النوم والصحيان لما حسيت بسليمان بيدخل الأوضة، البرفان بتاعه ملأ الأوضة كلها. انكمشت على نفسي وأنا بحسه بيقرب مني، وبعدين حضنني وهو يبوس راسي وبيقول:
ـ وحشتيني.
حاولت معيطش وقولت بصوت هادي:
ـ سليمان، عايزة أنام بجد.
بس هو مبعدش وقال:
ـ أنا عايز أتكلم، أتكلم وبس، أنا مخنوق قوي.
حد غيري كان هيتجاهله بس أنا مقدرش لأن ببساطة ده سليمان. قومت وأنا بتعدل بصتلها بهدوء وأنا بقول بتريقة:
ـ حصل إيه؟ العروسة موافقتش؟
ابتسم وهو بيلمس خدودي، لاحظت أن على صوابعه آثار حمرا كأنه ضرب حد بالبوكس. مسكت إيديه وأنا بقول بخوف:
ـ حصل إيه؟!
ـ اتخانقت مع أحمد.
ـ إيه؟ ليه عملت كده؟!
فضل يلعب في شعري ومردش.
ـ سليمان.. رد، ليه؟
ـ أنا بحبك يا رقية، أوصي تتخلي عني لو سمحتِ.
ـ أنت كويس يا سليمان؟ شكل مش طبيعي النهاردة.
بلع ريقه وقال:
ـ كنتِ تعرفي أن أحمد بيحبك قبل ما نتجوز؟
