منوعات

اغلال الروح شيماء الجندي

:

«طبعًا يا حبيبي، وبعدين سيبها تتعرف علينا ونحتفل بيها الأول، وافرج عنها  كدا!»

عقد حاجبيه وكاد يتحدث، لكن قاطعته صيحة رأفت والد آسر وإقباله تجاه سديم قائلًا:

«يا أهلا يا حبيبة عمو، حمدلله على سلامتك!»

استقامت سديم ورحبت به ببسمة صغيرة، تاركة إياه يحتضنها ويربت فوق خصلاتها بلطف، وهي تستمع إلى عاصم يقول:

«ده عمك رأفت يا سديم!»

عقد رأفت حاجبيه وعلق بدهشة:

«سديم؟»

أجابه يوسف مبتسمًا:

«آه، سديم هي سيلا، بس مش بتحب اسمها فغيرته!»

ابتسم لها رأفت وأردف بهدوء:

«آه وماله حبيبتي، سديم جميل برضه!»

هزت رأسها بالإيجاب، واستمعت إلى الجدة تقول بنبرة ذات مغزى:

«فين أمجد يا رأفت؟»

توترت نظراته في الحال، وألقى نظرة خاطفة تجاه عاصم الذي جذب سديم مرة أخرى إلى أحضانه وعقد حاجبيه.

وتحدث أخيرًا العضو الصامت آسر قائلًا بهدوء:

«عمي أمجد كان متابع الشغل طول اليوم، ومعاه مكالمة دلوقت، هيخلصها ويجي!»

لم تغفل سديم عن توتر الأجواء من حولها، لكنها فضلت المراقبة الصامتة بالوقت الراهن، ثم بدأت تدريجيًا تتفاعل بالأحاديث مع جميع أفراد الأسرة، خاصة يوسف وسليم.

أعجبها سلاسة الحديث وبساطته فيما بينهم، وشعرت بالألفة معهم، وقضت اليوم العائلي بين سعادة داخلية بتلك العائلة، وحزن تجاه الرجل الخمسيني الذي يراودها طوال اليوم، وتوتر طفيف من القادم!

في نهاية اليوم، وقفت شاردة داخل حديقة المنزل، حيث استطاعت أخيرًا الابتعاد قليلًا عن التوتر ونظرات العم أمجد المتفحصة طوال الوقت!

عقدت حاجبيها حين استمعت إليه يتحدث بهدوء فور أن وقف بجانبها:

«برضه عملتي اللي في دماغك؟»

رفعت سديم حاجبها الأيسر باستفهام، ليوضح آسر كلماته قائلًا بامتعاض:

«قولتي إن اسمك سديم!»

ابتسمت بهدوء وأجابت ببرود واضح:

«وأنا كنت وعدتك إني هغير اسمي؟»

عقد حاجبيه وأجاب بانفعال:

«أنت هتستهبلي؟»

هزت كتفيها بلامبالاة وأجابت:

«وأنا هستهبلك ليه يعني؟ أنا اسمي سديم وبحبه، والناس معندهاش مشكلة إنهم ينادوا عليا بيه، أنت بقى بتتدخل ليه؟»

رفع حاجبه الأيمن وأجاب ساخرًا:

«لا والله! طيب إيه رأيك بقى إني مش هقول غير سيلا؟»

ضحكت بقوة قاصدة استفزازه، وقالت بهدوء:

«وماله! وأنا مش هرد عليك، وقتها نبقى نشوف سيلا ترد عليك!»

عقد حاجبيه وجذبها من ذراعها إليه قائلًا بانفعال:

«إياك تعملي تصرفات غير مناسبة معايا! ومتتصرفيش من دماغك نهائي تاني!»

نظرت إلى يده التي تقبض بقوة على ذراعها، ثم قالت ببرود:

«أنا هتصرف من دماغي في كل مرة تتكلم معايا بالطريقة دي! مش عاجباك تصرفاتي، مكنتش اتعاملت معايا، ومش هغير اسمي عشانك ولا عشان أي حد. أنا بحب اسمي وهيفضل زي ما هو كدا، ومش هرد على أي حد يناديني بالاسم اللي مش بحبه! أنا سديم وبس!»

ثم رفعت يدها بهدوء تضعها فوق يده، ونجحت في تحرير ذراعها ببساطة، حيث تركها فور أن لمست يده، وأردف كاظمًا انفعاله:

«اسم سيلا مش عاجبك، واسمك اللي ملوش معنى هو اللي حلو؟»

زفرت بضجر وقالت بملل:

«أنا معنديش طاقة أدخل معاك في نقاش بالليل كدا. خلينا في المهم، أنت مقولتليش إن جدتك محتاجة رعاية خاصة بسبب سيلا ليه؟»

عقد حاجبيه وأردف بخشونة:

«وأنت مالك بحاجة زي دي؟ ومين قالك أصلًا إنه بسبب سيلا؟»

عقدت حاجبيها هي الأخرى وأجابت بدهشة:

«هو إيه دا اللي أنا مالي؟ موقف حصل بسبب واحدة أنا بتعامل بشخصيتها، وجدتك بقت محتاجة رعاية خاصة بسببها! مش المفروض أعرف؟ لولا يوسف وقع بالكلام، واللي استوعبته إن كنت أنا السبب!»

أغمض عينيه بقوة وقال بانفعال:

«أنا عرفتك كل اللي تحتاجيه، غير كدا ملكيش أي دعوة. أنت مش هتتصاحبينا، أنت هنا لدور محدد تقومي بيه وتاخدي حسابك وتختفي، وأي حاجة زيادة أنا المسؤول عنها مش أنت!»

رفعت كتفيها ببرود وقالت بهدوء:

«خلاص أنت حر، عني ما قولت! أنا أصلًا مبحبش التفاصيل والصداع!»

تركته واتجهت للداخل، ثم توقفت فجأة وقالت:

«آه على فكرة، اسمي معناه الضباب الناعم!»

الفصل الثاني: جمرات!
دارت سديم داخل تلك الغرفة الهادئة بذلك المنزل الأنيق، تراقب الأثاث والتحف الصغيرة بفتور واضح، ثم أطلقت أنفاسها بإرهاق وتوجهت إلى الزجاج الذي يطل على الحديقة.

وشردت بماضيها حيث اجتماعها بعائلتها في الماضي منذ عشرة أعوام!

دمعت عيناها حين مر على عقلها والدها ووصاياه وأحاديثه الشيقة. ذكرى جميلة أعاد شعورها بها اليوم عاصم دون قصد، لكنها تركت بداخلها ألمًا عميقًا!

Flash back…

جلست سديم في منزل خالها بجانب والدتها نبيلة، تستمع إليه يقول مبتسمًا:

«ما شاء الله يا نبيلة! بنتك كبرت واحلوت أوي!»

ابتسمت نبيلة بتكلف وقالت:

«آه، سديم ما شاء الله عليها وشاطرة وذكية، يعني مش هتغلبك!»

هز رأسه بالإيجاب وقال بلطف:

«قاعدة مكسوفة كدا ليه يا سديم؟ دا أنت في بيت خالك يا حبيبتي! تعالي جنبي هنا!»

تسمرت بمحلها لحظات قبل أن تستقيم واقفة بابتسامة صغيرة زينت ثغرها، بعد إشارة من عيني والدتها.

توجهت سديم إليه وجاورته بمجلسه، ليحيط سامح كتفيها بذراعه قائلًا:

«أنا زي بابا يا سديم، اوعي تتكسفي تطلبي مني أي حاجة في يوم من الأيام. أنا ربنا مرزقنيش بعيال آه، بس أنت مولودة على إيدي وزي بنتي، الله يسامح اللي فرقنا بقى!»

ألقى نظرة عتاب تجاه والدتها نبيلة التي علقت بحزن قائلة:

«أهو ربنا جمعنا تاني يا سامح، وإحنا اللي محتاجينك أهو!»

عقد حاجبيه وأردف بخشونة:

«محتاجة دا إيه يا نبيلة! دا أنت وبنتك فوق راسي، وحتى جوزك اللي مش بيطيقني، أنا موجود ليه وقت الحاجة!»

أغضبها حديثه عن والدها، وازداد انزعاجها حين صمتت والدتها ورسمت تلك البسمة المنكسرة فوق شفتيها.

تعرف تلك البسمة عن ظهر قلب منذ حادث والدها وفقدانه البصر والحركة وجلوسه فوق مقعد متحرك، ولم تفارق تلك البسمة محياهما، وكأن كل واحدة منهما تخدع الأخرى بصمود واهٍ!

لاحظ سامح شرود سديم ونظراتها المتسائلة الموجهة ناحية أمها، وكأنها تعاتبها بصمت على أقوال الرجل المجاور لها، والذي عرفت أنه خالها منذ ساعات قليلة، ومن الواضح أن والدها على خلاف معه!

كسر سامح الصمت وقال بضحكة خفيفة:

«أنتوا بقى هتتغدوا الأول، وبعد كدا نتفاهم!»

صاحت فجأة نبيلة بتوتر:

«لا لا، غدا إيه؟ إحنا مش عايزين نتأخر على أسامة ونيرة. أنت عارف ظروفه دلوقت، ونيرة صغيرة مش هتعرف تقعد معاه أكتر من كدا!»

عقد حاجبيه قائلًا:

«ولزمتها إيه التعب دا كله يا نبيلة؟ ما أنا قلتلك تيجوا تقعدوا هنا معايا في الفيلا، مرضيتوش. قلتلك أجهزلك الفيلا الصغيرة، مرضيتيش برضه. عرضت عليك أبعتلك مساعدة وأتكفل بكل مصاريفها، رفضتي. أنت مش حمل التعب دا!»

بدأت الأسئلة تتكاثر بعقل سديم. لماذا يقاطع والدها رجلًا بكل هذا السخاء؟ من الواضح أنه يرغب بمعاونة شقيقته، إذًا ما سبب القطيعة والجفاء؟

ليقول فجأة ضاغطًا بخفة فوق كتفها:

«احضرينا أنت يا عاقلة! مش لما نلاقي حد محتاج لازم نساعده؟»

عقدت سديم حاجبيها وأجابت تلك المرة بانزعاج فور أن استقامت مبتعدة عنه:

«بابا مش محتاج مساعدات من أي حد، وإحنا هنا عشان كدا، أشتغل وآخد مقابل شغلي مش شفقة!»

ابتسم لها سامح بلطف واستقام هو الآخر، يستمع إلى والدتها تقول بلطف:

«سديم ما ينفعش كدا، خالو ما يقصدش!»

اتجه إليها سامح ووضع يديه فوق كتفيها قائلًا بإعجاب:

«سيبيها يا نبيلة، أنا أحب البنات اللي تدافع عن حقها وحبايبها ومتسكتش. جدعة يا سديم، وجدعنتك دي هتنفعك أوي في شغلك معايا! وآسف يا حبيبتي لو كلامي ضايقك!»

صمت لحظات ثم أكمل:

«مش أنت عندك 16 سنة دلوقت يا سديم؟»

هدأت قليلًا متأثرة بإطرائه، وهزت رأسها بالإيجاب، ودهشتها تزداد من سر ابتعاد والدها عن ذلك الرجل المتفاهم إلى هذا الحد!

أكمل سامح متجهًا إلى والدة سديم، وأمسك الظرف المتواجد منذ قدومهم فوق المنضدة قائلًا بلطف:

«أمسكي يا نبيلة، دا جزء من مرتب سديم. مشي الفترة دي حياتك كدا، وارجعي لمستواك بقى، وسديم هتبدأ شغل معايا من بكرة، وهجهزلها أوضة هنا بتاعتها، واطمني هتبقى تحت عيني طول الوقت!»

ابتسمت نبيلة له وأمسكت الظرف بيدها تقول بدهشة:

«بس دا شكله كبير يا سامح، جزء من مرتب إزاي؟»

ابتسم لها ورفع رأسه بكبرياء قائلًا بفخر:

«سديم بنتك هتبقى زي دراعي اليمين يا نبيلة، وأنا هلاقي حد زي بنت أختي آمنها على حالي ومالي؟ ميرفت مهما كان ليها أهلها، ومش هستنى أهل ميرفت يورثوني في الآخر عشان ربنا مكرمنيش بعيل! بذمتك مش بنتك أولى بالخير دا كله؟»

أشار بيديه إلى مظاهر الترف من حوله، وعيناه لم تفارق سديم التي نظرت إليه بهدوء وصمت، على عكس أمها التي أبدت رغبتها وبهجتها بتلك البداية، ووقفت قائلة بتوتر:

«طيب وفي سنها هتعرف تساعدك يا سامح؟»

عقد حاجبيه وأجاب بانزعاج:

«قلقانة على بنتك ولا إيه يا نبيلة؟ على العموم تعالي بكرة معاها وشوفي مكتبها اللي هتقعد فيه، وأوضتها هنا تتفرش على ذوقك. أنا عايز أعوضكم عن التعب اللي شوفتوه يا نبيلة، أبقى غلطان برضه؟»

هزت رأسها بالسلب وأجابت بقلق:

«لا، غلطان دا إيه؟ هو حد يقدر يقول كدا؟ كتر خيرك أوي على وقفتك دي يا سامح!»

اتجه إليها يحتضنها ويقول بلطف رابطًا على كتفها:

«عيب يا أختي، دا أنا وكل اللي ملكي بتاعك أنت وحبيبة خالها دي. وسلميلي على نيرة بقى، لولا الظروف كنت جيت وزورتها هي وأسامة!»

تنفست بهدوء وابتسمت له تقول:

«ربنا يخليك لينا يا حبيبي. مش محتاج أقولك أنا هكلمك، بلاش أسامة يعرف إني جيت!»

هز رأسه بتفهم وأجاب:

«طبعًا طبعًا، متقلقيش! خدي بالك من ماما يا سديم!»

ودعهما سامح، وفور أن خرجت سديم قالت برفض واضح:

«أنا مش مرتاحة يا ماما لكل دا! إيه الفلوس الكتير أوي دي؟ وليه نخبي على بابا وإحنا جايين، ونخبي إني هشتغل مع خالو؟ وليه أصلًا بابا مقاطع خالو؟»

زفرت نبيلة بانزعاج وقالت:

«كنت عارفة إني مش هخلص من أسئلتك يا سديم! أنا مش قعدت معاك وعرفت وضعنا كله؟ عاجبك وضع باباك؟ عاجبك إننا مش قادرين نعمله عمليات، ولا قادرين على مصاريف العلاج حتى؟ عاجباك حياتنا؟»

عقدت سديم ذراعيها أسفل صدرها وأجابت بحزن شديد على حالة والدها:

«أيوه، بس دا مش مبرر إننا نخدعه، وبابا مش هيزعل لو عرف إني بشتغل وبذاكر برضه، وكمان مع حد قريب مننا كدا!»

رفضت نبيلة وأردفت بتوتر:

«أوعي يا سديم! بابا مش هيقبل، وكمان هنجرحه لو حس إنه مش قادر يكفي احتياجات البيت، هيزعل أوي!»

صمتت لحظات ثم أكملت:

«مش أنت كنت لسه بتسألي بابا بعيد عن سامح ليه؟ عشان سامح كان رافض جوازنا أصلًا بسبب حالة والدك المادية، ولما أنا أصريت اضطر يوافق وقاطعنا. وتخيلي بقى لو باباك عرف دلوقت إنك هتشتغلي مع خالك اللي رفض كل دا من الأول! ليه نعمل مشاكل؟ الدنيا مش ناقصة، وخالك مش هيخليكي تتعبي، وهو أمان لينا، وهيوفرلك أوضة هنا تذاكري وترتاحي فيها لو حابة، وحتى في الشغل مش هيضغط عليك. عشان خاطري يا سديم، أنا مصدقت ألاقي حل! الدنيا بدأت ترجع زي الأول، إحنا هنروح دلوقت كمان نجيب علاج باباك حالًا أهو!»

ورفعت أمام عينيها الحزينة ظرف الأموال، ثم اقتربت منها تحتضنها وتقول بلطف:

«معلش يا سديم، أنا عارفة إنه ضغط عليك، بس كلنا في الظروف دي. مساعدتنا في إيدك، ولا مصاريفك، ولا مصاريف مدرسة أختك هقدر عليها، ولا هعرف أشتغل زي ما فهمت باباك. أنا أصلًا معنديش خبرة في أي حاجة، ولولا عرض خالك، وعشان أنت صغيرة هتفيديه طبعًا في شغله، كنت أحسن حل لينا!»

شعرت نبيلة أنها أخيرًا نجحت في إقناع ابنتها بقبول وظيفة بسيطة، ومن وجهة نظرها لن يضرها خالها، ولن يضر والد سديم إخفاء الأمر!

العائلة على وشك الانهيار، إما التضحية براحة واحدة منهم، أو سوف تفقد جميع ما تملك في ليلة وضحاها!!!

ابتسمت سديم لوالدتها وقررت معاونتها، لعلها ترى أباها كما كان! لعله يعود إلى تمام الصحة والعافية، لعلها ترى بريق عينيه اللامع بهجة بها! لعلها ترى النور يعود إلى عينيه!

منذ تلك اللحظة تحولت سديم، وفقدت نقاء روحها، وأصبح الخداع والمراوغة رفيقيها إلى الآن.

وبين انهزام وانتصار، وانكسار وجبر، تركت جسدًا بلا روح، أو بمعنى أدق جسدًا يحمل روحًا مهشمة!

إلى كل من يرغب في الاحتفال معي بانتصاراتي، أين أنت حين كنت أخوض المعارك بمفردي؟

Back

استقامت واقفة بابتسامة فاترة رسمتها فوق شفتيها بصعوبة بالغة، حين طرق عاصم الباب ودلف إليها بابتسامته البشوشة يقول بقلق:

«الأوضة عجبتك يا حبيبتي؟»

هزت رأسها بالإيجاب وقالت بهدوء وهي تتجه ناحيته:

«آه، Nice decor، ديكور جميل!»

ثم أضافت بتساؤل:

«أنا ممكن أسأل عن حاجة؟»

اتجه معها إلى الأريكة وجلس بجوارها قائلًا:

«طبعًا، مش محتاجة استئذان!»

تنفست بهدوء وقالت:

«حضرتك متجوز وعندك بنت تانية، مش كدا؟»

توترت نظراته وعقد حاجبيه قائلًا بقلق:

«مين قالك؟ أنا كنت هستنى لحد ما تاخدي على العيلة وأقولك أكيد!»

رفعت حاجبها مبتسمة وقالت بدهشة:

«طيب وليه كل دا؟ دا حقك وحاجة ما تضايقش أكيد عشان تستخبى! هما فين؟»

ابتسم لها وأردف بحماس:

«هما في السخنة، بس هتصل أقولهم يرجعوا الصبح!»

ابتسمت له بهدوء وقالت بضحكة خفيفة:

«لا لا، سيبهم على راحتهم يرجعوا لما يحبوا. أنا بس حبيت أعرفك إنك مش محتاج تخبي عيلتك عني!»

رفع عاصم حاجبه الأيسر وقال بمداعبة:

«ماشي، بس مش أنا لوحدي اللي بخبي حاجات. أنا لحد دلوقت معرفش تفاصيل عن والدتك، بس مش عايز أعرف غير لما أنت تحبي تحكي!»

رفعت عينيها ونظرت إليه بحزن، واجتمعت الدموع بعينيها، وعقلها يرسم صور والدها بمخيلتها، وكأنه يتعمد إعادتها إلى ذكريات تحاول الفرار منها.

أفاقت حين رفع يديه يكور وجهها قائلًا بلهفة:

«سديم! مالك يا حبيبتي؟»

هزت رأسها وأجابت بهدوء:

«أنت طيب أوي، بتفكرني بحد أعرفه!»

عقد حاجبيه وسأل:

«مين؟ ودا يخليك تزعلي كدا يا حبيبتي؟»

ابتسمت له وقالت بألم:

«بابا، واحدة صاحبتي، بس مش موجود خلاص!»

ضم شفتيه بحزن واحتضنها يربت فوق خصلاتها قائلًا بلطف:

«أنا آسف إني فكرتك!»

تركت دموعها تهبط بهدوء وهمست بخفوت، وهي داخل أمان أحضان ذلك الرجل الذي أجبرها على استرجاع ذكريات منذ أعوام تحاول الفرار منها:

«أنا مش بنسى أصلًا!»

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى