منوعات

اغلال الروح شيماء الجندي

وأن عناق أبي لا زال عالقًا بين ثنايا عقلي وقلبي.

لا زلت أراقب الصبايا التي تجاور أباها في الطريق وتتمسك به إن تعثرت… لا زلت أنظر إلى جميع الآباء بأعين يملؤها الحنين.

ومع كل انتصار أعود إلى وسادتي ليلًا، وتبدأ معركة خيالاتي حول نظراته لي وأحضانه وثنائه المحبب إلى قلبي حين يراني بذاك الصمود!

لا زلت أغمض عيناي ليلًا وأنتظره داخل أحلامي لأخبره عن هزائمي دون خجل.

لا زلت ولا زلت، لكن قد غاب أبي عن الحياة وترك أحبة تنتظره كل ليلة داخل وهم يسمى الأحلام!

داخل الحديقة…
داخل الحديقة المظلمة، أمسكت سديم المصباح الصغير وسارت بخطوات حذرة تقول بصوت مرتفع:

«حد هنا؟!»

عقدت حاجبيها حين استمعت إلى أصوات خافتة خلف الشجرة الكبيرة المثمرة، وتدريجيًا أبصرت جسد والدها يتحرك فوق الأرض بصعوبة بالغة، يحمل فوق ظهره صندوقًا صغيرًا، لكنه يبدو ثقيل الوزن!

هرعت إليه وهبطت أرضًا تجلس بجانبه قائلة بدهشة، تحاول إزاحة الصندوق عنه:

«بااابا! أنت إيه اللي عمل فيك كدا؟ وإيه الصندوق دا حاطه كدا ليه؟!»

رفع أبوها وجهه المتعرق، ورأت ملامحه شديدة الأسى، ينظر إليها بألم قائلًا:

«أنت مين؟ أنا معرفكيش! الصندوق دا بتاع بنتي سديم، ولازم أوصله!»

انطلقت الدموع من عينيها وأردفت بقلق، ولا زالت محاولاتها لرفع الصندوق عنه مستمرة:

«أنا سديم يا بابا!»

نظر أسامة إليها وعقد حاجبيه قائلًا بدهشة:

«لو كنت سديم كنت هتقدري ترفعي الصندوق! أنا معرفش صوتك ولا دي ملامح بنتي!»

ثم رفع صوته فجأة حين وضعت يدها فوق الصندوق تحاول استكشاف سبب ثقله، لكنها أبعدتها حين قال بتعب:

«آه، تقيلة الحمولة يا بنتي!»

انتفضت سديم فوق فراشها، تضع يدها فوق صدرها الذي يرتفع ويهبط بقوة، ورفعت يدها الأخرى تسير بها حول عنقها بهدوء وهي تهمس:

«مكنش قصدي أتقل حملك!»

وأحيانًا تصبح الأحلام كالجمرات، تحرق أرواحنا، وكأنها تخبرنا أن ذكرياتنا المؤلمة لم ولن تخمد، بل إنها تتعمد إرسال رسائلها إلينا على هيئة جمرات!

ثم أغمضت عينيها وقد انتظمت أنفاسها بعد فترة صغيرة، لكنها عقدت حاجبيها حين ارتفع رنين هاتفها برقم غير مسجل، لكنها تحفظه عن ظهر قلب!

رفعت الهاتف إلى أذنها وقالت بنبرة جافة:

«دي مواعيد اتصال؟ الساعة 3 الصبح!»

استمعت إلى ضحكته الرجولية ثم نبرته المداعبة يقول:

«أهو أنا متصل مخصوص عشان أسمعك بتكلميني كدا!»

زفرت بإرهاق وأسندت جسدها إلى الوسادة خلفها تقول بفتور:

«عايز إيه يا سامح؟ أنا مش طايقة نفسي!»

استمعت إليه يتنفس بملل ويقول:

«يووه يا سديم، على طول بتقللي حماسي ببرودك كدا! على العموم مادلين ظهرت وقابلتني، والموقف كان غريب، تخيلي بس! الورق اللي معايا قلقها أوي، واعتذرتلي عن سوء التفاهم!»

أنهى كلماته ضاحكًا بقوة، بينما ضيقت سديم عينيها وعلقت متسائلة:

«الورق! أنت مصور الورق على فونك ليه أصلًا؟»

استمعت إليه يقول ساخرًا:

«ليه؟ عشان موقف زي كدا يا سديم! هو أنا اللي هقولك الكلام دا؟ دا أنت أجدع واحدة في الخروج من المواقف الصعبة!»

جزت على أسنانها بقوة وقالت بانزعاج طفيف:

«بخرج من المشاكل من غير ما أضغط على الناس!»

ضحك بقوة وأردف:

«وأنا بحب شغلك عشان كدا يا قلب خالك، على نضيف دايمًا! عشان كدا أنت عندك دلوقت بالمناسبة أمجد بيدور عليك، وبعت صورك لواحد يشوف حكايتك. شكلهم لسه قلقانين. أنا ظبطت الدنيا، وأنت حاولي تنجزي بسرعة. العيلة دي كبيرة ومليانة تفاصيل!»

رفعت حاجبها حين نظرت من خلف زجاج غرفتها المطل على الحديقة، ورأت أحدهم يجلس بالخارج فوق الأريكة.

همست حينها بخفوت:

«اقفل دلوقت يا سامح، وخد بالك من مواعيد اتصالك لو خايف على الموضوع دا وعايزه يتم من غير مشاكل!»

وافقها الرأي وأجاب:

«عندك حق. بالمناسبة أنا طلبت دفعة جديدة من آسر تحت الحساب، يعني عشان يفضل متابع معايا كدا!»

زفرت بملل وأجابت:

«بقولك إيه، اعمل اللي تعمله معاه، أنتوا أحرار. أنا كل اللي يهمني نصيبي وبس. سلام بقى!»

أغلقت الهاتف ولم تنتظر رد، ثم أزاحت الباب الزجاجي وخرجت إلى الحديقة تسير بخفة، لكنها توقفت فجأة تعقد حاجبيها حين وجدت أمجد، وهو الشخص المجهول، يجلس واضعًا يده فوق صدره ويميل إلى الأمام قليلًا.

رددت بصوت واضح ومسموع:

«Are you ok? أنت بخير؟»

ثم واصلت سيرها بخطوات أسرع حين لم تجد ردًا ولم يلتفت إلى مصدر الصوت.

وقفت أمامه وضيقّت عينيها حين رفع رأسه وقد احتل الألم ملامحه وقال:

«أنا تمام، كنت هطلع البيت، بس حسيت بتعب، قلت أرتاح دقايق. روحي أنت!»

أجابته بفتور:

«تحب أكلم سليم؟»

استقام فجأة صائحًا بقلق:

«لا، اوعي تعمليها! آه!»

أنهى جملته بصوت متعب، وقد اشتد الألم ومال إلى الأمام، مما دفعها إلى إمساك كتفيه وإجباره على الجلوس قائلة بجمود:

«أنت محتاج حد يساعدك!»

صمتت حين وجدت آسر يظهر فجأة، وصدره يعلو ويهبط بقوة وأنفاسه غير المنتظمة تخبرها أنه رآها وأتى مسرعًا.

صاح بها فجأة وهو يبعد جسدها عن عمه ويجلس أمامه محاولًا استكشاف سبب ألمه:

«أنت عملتي إيه؟»

رفعت حاجبها بدهشة وأردفت:

«أنت لسه هتتكلم؟ دا شكله بيمر بأزمة! يا تنقله مستشفى يا تطلب إسعاف وتلحقه!»

نظر إليها بانفعال وأجاب ساخرًا:

«والدكتورة كانت بتشخص حالته بقى؟ كل دا ليه؟ منادتيش علينا ليه؟!»

عقدت حاجبيها وتنفسَت بهدوء، ثم نظرت إلى عمه المتعب وقالت بنبرة حادة قليلًا:

«أنت لسه هتتخانق؟ دا محتاج مساعدة بسرعة! هات مفاتيح عربيتك، اخرجها وأنت ساعده لحد برا!»

أخرج المفاتيح من بنطاله وتركها لها، ثم مال يعاون أمجد بالوقوف، بينما ركضت هي إلى السيارة.

وما هي إلا لحظات حتى كانت أمامه بها، تهبط منها وتفتح الباب الخلفي وتدلف إلى الداخل، وتعاونه عن طريق جذب جسد أمجد إليها.

أسرع آسر إلى مقعد القيادة ليصل به إلى أقرب مستشفى.

أما أمجد فقد شحب لون وجهه، وتمكن التعب من صدره، ولا زال يقبض بقوة فوقه محاولًا تنظيم أنفاسه.

راقبها آسر وهي تحل ربطة العنق الخاصة به، ثم أول زر من القميص، وهي تتحدث إليه قائلة:

«متقلقش، دقايق ونوصل!»

قبض أمجد على يدها بقوة وأغمض عينيه، فعقدت حاجبيها بتأثر، لكنها رفعت يدها اليسرى وحلت ساعة اليد الخاصة بها، وبعد عناء قليل نجحت في وضعها في يده، وبدأت بقياس معدل نبضات قلبه ومتابعة مؤشراته الحيوية تحت مراقبته ودهشته من اهتمامها!

بعد مرور ساعتين داخل المستشفى…
توجه الطبيب إليهما ثم توقف أمام سديم، وجالت عيناه على ملامحها، قبل أن يقف آسر مثل الحائط البشري يحول بينها وبينه قائلًا بانفعال:

«خير؟»

توترت نظرات الطبيب وقال:

«أستاذ أمجد حالته مستقرة جدًا، ويقدر يروح معاكم كمان دلوقت. واضح إنه بيتكرر معاه التعب بتاع النهاردة ومش بيقول، لأن دي أعراض مشكلة صحية في القلب، وإحنا عملنا الإسعافات اللازمة. والمعلومات اللي قالتها الآنسة عن مؤشراته الحيوية اللي قاستها في الطريق ساعدتنا الحقيقة. ياريت كل الناس عندها الوعي دا!»

كانت سديم قد وقفت بجانب آسر تتابع تشخيصه بهدوء، إلى أن تحدث لها الطبيب وابتسم فجأة، فبادلته ببسمة مصطنعة وصمتت تبتعد عنه، تاركة إياه مع الآخر الذي أردف بخشونة موجهًا حديثه إليه:

«لأ، وخد بالك زي ما في ناس عندها وعي، أنا أعرف ناس بتفقد الوعي لما عينهم تزوغ منهم كدا!»

زفرت بإرهاق ثم توجهت إلى الغرفة التي تضم أمجد وسليم ويوسف، الذي فور أن رآها اتجه إليها يقول باهتمام وصوت خافت:

«الدكتور طمنكوا؟»

هزت رأسها بالإيجاب وابتسمت له، تنظر إلى أمجد الذي جلس فوق المقعد يعاونه ابنه بإغلاق أزرار قميصه، لتقول:

«هو أول مرة يحصله كدا؟»

هز كتفيه وقال:

«مش عارف، دي أول مرة يحصل كل دا أصلًا. آسر لما كلمنا مصدقناش إنه اتنقل مستشفى!»

قاطع حديثهم وصول سليم قائلًا بامتنان:

«أنا مش عارف أشكرك إزاي يا سديم! لولا وجودك مكنش حد حس بيه. الحمدلله إنك كنت معاه في وقتها!»

ابتسمت له وأجابت بعبث:

«دا أنا قولت هتقولوا حصل كل دا من أول يوم قعدت فيه معاكم!»

ضحك يوسف وأردف:

«لأ، اللي ممكن يقول كدا حد تاني خالص، لكن إحنا عاقلين متقلقيش!»

رفعت حاجبها الأيسر وأردفت بتساؤل:

«مين بقى؟»

مال يوسف وهمس بأذنها لتضحك بخفة، وكادت تتحدث لكن وصول آسر غاضبًا يقول بانفعال واضح:

«أنت إيه اللي كان موقفك برا؟»

نظرت إليه بهدوء، بينما قال سليم بدهشة:

«فيه إيه يا آسر؟»

انتظر ردها لكنها آثرت الصمت، وراقب ملامحها الجامدة ببرود واضح، بينما أكمل هو بانفعال:

هزت كتفيها بلامبالاة واضحة وأجابت:

«آه، أخدته!»

رد بانفعال:

«وليه متقوليش إن لقى حاجة مباحة قصاده؟!»

ابتسمت ببرود وأجابت:

«معلش، المرة الجاية هقولك استنى لحد ما ألبس، والمريض يتعب أكتر عادي! وبعدين أنت مالك؟!»

ثم تركتهم وكادت تغادر، لكنه رد بانفعال:

«أنا اللي غريب ولا أنت اللي مش بتاخدي بالك من تصرفاتك؟!»

عادت إليه مرة أخرى وردت بابتسامة ماكرة:

«طيب هفرض معاك إني المفروض أخد بالي في وقت أزمة زي دا، وأسيب الناس من غير مساعدة وكدا. أنت بقى كنت فين؟ مش أنا ركبت معاك العربية وجيت لحد هنا بنفس الشكل!»

ضيق عينيه بانفعال وصمت، لكنها أكملت غير مبالية:

«ولا أنت قولت محدش شافها يبقى عادي، لكن أول ما حد عينه مشغولة بالتفاصيل يبقى المشكلة مني لوحدي، مش كدا؟!»

أنقذه سليم الذي قال بابتسامة:

«مش كدا يا جماعة! إحنا سايبين بابا تعبان، ولازم نمشي دلوقت بيه، الصبح طلع علينا!»

ليهمس يوسف له:

«النقاش مع ابن عمك دلوقت محتاج صبر، تلاقيه متوتر جدًا!»

وقاطع حديثهم أمجد الذي قال بإرهاق:

«مين دا اللي تعبان؟ أنا تمام أوي، وهمشي مع سديم قصادكم وأسيبكم هنا لوحدكم!»

ثم اتجه إليها يحيط كتفيها ويسير معها إلى الخارج قائلًا بأسف:

«متشكر على اللي عملتيه معايا، وآسف لو كانت مقابلتي ليك مش أحسن حاجة امبارح، بس حطي نفسك مكاني، أنا قلقت على أخويا!»

ابتسمت له وأجابت بهدوء:

«آه أكيد فهماك، المهم إنك بخير. حمدلله على سلامتك!»

ربت فوق كتفها وأجاب:

«الله يسلمك!»

ثم واصلا السير بصمت إلى السيارات، ليقف آسر قائلًا:

«تحب تركب معانا يا عمي ولا مع يوسف وسليم؟»

كاد يجيبه، لكن قالت سديم:

«معانا دي اللي هما مين؟»

أجاب ساخرًا:

«هيكون مين يعني؟ أكيد أنا وحضرتك!»

هزت كتفيها وأجابت بهدوء:

«آها!»

ثم نظرت إلى سليم مبتسمة بلطف وقالت:

«هو أنت مكسوف مني يا سليم؟ يعني من لبسي أو شكلي؟»

رفع حاجبه بدهشة وأجاب بعفوية:

«لا طبعًا!»

ابتسمت له وأعادت السؤال على يوسف:

«وأنت يا يوسف؟»

نظر إلى سليم ثم قال مندهشًا:

«أكيد لأ يا سديم، ليه بتقولي كدا؟»

أجابته بفتور:

«بقول كدا عشان مش هركب مع الكابتن، يا هركب معاكم يا هتصرف وأروح لوحدي. أنا مبركبش مع حد بيتكسف مني!»

رد آسر بانفعال وأشار إلى حاله بدهشة:

«أنا قولت كدا؟!»

أجابت بسخرية:

«أنت قولت الأسوأ من كدا، واتدخلت في حاجات متخصكش!»

أنهى أمجد النقاش وقال:

«خلاص كفاية كدا يا ولاد! سديم هتركب معايا أنا وسليم، وأنت يا آسر معاك يوسف، ويلا بقى خلونا نروح، الشمس طلعت!»

وقد كان، وعاد الجميع إلى المنزل بسلام، إلا ذاك المارد المشتعل بانفعاله من موقف معقد وضع نفسه فيه بين آل بيته!!!!!

الفصل الثالث: خبايا!
دلف إلى منزله ينزع قميصه بانفعال وألقاه جانبًا، ثم اتجه إلى المرحاض وهو يفرغ محتويات بنطاله، لكنه عقد حاجبيه حين وجد ساعتها الذكية التي وضعتها لأمجد.

زفر بملل وهمس:

«طلعالي في كل مكان! أنا إيه…»

3 من 3التالي
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى